甜品屋內的的奇怪男人聚會

年三十晚，同屋企人食過團年飯，坐埋一邊食水果。無聊間拎起手機就順便問下班小學雞有無人出黎食糖水聚下一齊蛇過馬年。

點知覆機嘅只有男同學! 唔緊要，出左黎先算。

三個男人約左係西灣河等，講到食糖水，西灣河數埋唔係明記就甜嫂，再唔係就太安樓入面嘅老牌糖水。之前教會朋友經常幫襯嘅四季就聽聞於早前已經結業，原址開左新店甜甜屋
，求求其其之下就同兩位好兄弟入左去坐低。

呢間舖有提供較為特別嘅盤栽甜品，但我地今次order 嘅就係比較普通嘅Blue Burberry Cheesecake 加雲呢拿雪榚，另外一位兄弟就揀左焦糖香蕉窩夫加雲呢拿雪榚，一於試下佢嘅甜品基本功。

Blue Burberry Cheesecake 加雲呢拿雪榚

 我承認我係雲呢拿雪榚嘅fans，每次品嚐雲呢拿雪榚嘅時候都會慢慢等待雪榚入面嘅Vanilla seed 香味同埋cream嘅鮮味 (我知道大部份都係用vanilla extract...唉~但我仲好期待有例外)。所以甜品一上檯我就忍唔住先試下個雪榚，入口約五秒，如我所料...都係普通貨色。

之後再睇下個cheesecake，一睇就知係焗嘅款式而唔係凍餅。個人認為焗cheesecake 會比較難做得芝味適中，小弟乃係cheese lover所以對芝味比較sensitive，係我嘅經驗入面焗cheesecake好多時一係就無芝味，一係就芝味被過度嘅牛油味蓋過，似食牛油多過食cheesecake。

呢到個cheesecake 焗得唔錯，芝味適中而且慢慢從中散發出黎，令人好想繼續食落去以尋找更多嘅cream cheese。用叉輕輕界開cheesecake 嘅尖位，放入口後可同時感受到藍莓醬帶黎嘅濕潤、再帶出cheesecake 嘅微微芝士味，最後當然係消化餅餅底嘅小麥香味。但因為中間蛋糕位置焗得比較粗糙影響口感，所以今次唔可以話係完美嘅配搭。不過！有時世事就係咁樣有啲缺憾先至令人印象深刻，我個人口味認為都幾特別，所以今次都收貨啦。

焦糖香蕉窩夫加雲呢拿雪榚

有窩夫賣嘅舖頭好多時都充斥住一陣陣可以令人好肚餓但亦都可以令人作嘔嘅牛油味。呢間舖都唔例外，不過佢都唔算緊要架啦...可以接受啦。

呢到個窩夫都做得唔差，上檯時保持微暖，而唔會過熱或凍曬。外脆內軟入口鬆軟，絕對唔怕食到個口損曬生飛滋。焦糖香蕉加上少許肉桂粉引出香味，配上窩夫味道好match。 有人會喜歡冷熱相撞，即所謂「ice-fire」，今次呢款甜品係可以比你感受一下呢個「ice-fire」嘅光速快感，雪榚嘅creamy 加上脆身嘅窩夫，層次感真係出曬黎。

甜品就嘆完，三個男人就緊係會吹下水交流下，但同時亦發現呢檔野都係中學生比較多，而且有唔少都係成班小女孩嘅聚會。呢一刻，我地三個大男人就顯得有點兒另類...或者我地可能會覺得自己青春左。